“Naxçıvan” Universitetində “İqtisadiyyat” kafedrasının təşkilatçılığı ilə “Naxçıvan Muxtar Respublikasının sosial iqtisadi inkişafı” mövzusunda elmi-praktik konfrans keçirilib.
Tədbiri giriş sözü ilə “Naxçıvan” Universitetinin prorektoru Hüseyn Bağırsoylu açaraq konfransın keçirilməsinin əhəmiyyətindən danışıb. Bildirib ki, ölkə iqtisadiyyatında özünəməxsus yeri olan Naxçıvan Muxtar Respublikası bütün sahələrdə sistemli şəkildə həyata keçirilən islahatlarla dinamik inkişaf dövrünü yaşayır. Qazanılan uğurların təməlində dayanan əsas faktorlardan biri qəbul olunan Dövlət proqramlarının uğurla həyata keçirilməsidir. Naxçıvan Muxtar Respublikası Ali Məclisi Sədrinin 2014-cü il 1 sentyabr tarixli Fərmanı ilə təsdiq olunmuş “Naxçıvan Muxtar Respublikasının 2014-2018-ci illərdə sosial-iqtisadi inkişafı Dövlət Proqramı”nın icrası bu baxımdan mühüm əhəmiyyət kəsb edib.
Daha sonra Naxçıvan Muxtar Respublikası İqtisadiyyat Nazirliyinin Sənaye şöbəsinin müdiri Elnur Mahmudov “Naxçıvan Muxtar Respublikasının 2014-2018-ci illərdə sosial-iqtisadi inkişafı Dövlət Proqramının icrasının yekunları və gələcək perespektivləri” mövzusunda, “Naxçıvan” Universitetinin “İqtisadiyyat” kafedrasının müdiri Dilsuz Qasımovun “Naxçıvan MR-da qəbul edilmiş sosial-iqtisadi inkişaf proqramlarının iqtisadi inkişafa təsiri” mövzusunda və “İqtisadiyyat” ixtisasının I kurs tələbəsi Coşqun Hüseynovun “Naxçıvan MR-nın sosial-iqtisadi inkişaf proqramlarının icrasının əhalinin həyat səviyyəsinin yüksəldilməsində rolu” mövzusunda çıxışları dinlənilib.